ප්‍රාදේශීය ලේකම් කාර්යාලය - සම්මන්තුරය

சம்மாந்துறை பிரதேச செயலகத்தில் "செயிரி வாரம்" செயற்படுத்துதல்.

"க்ளீன் ஸ்ரீ லங்கா (Clean Sri Lanka)" தேசிய வேலைத்திட்டத்திற்கு இணையாக அரசாங்க நிறுவனங்களில் காணப்படும் வரையறுக்கப்பட்ட இடப்பரப்பை பயனுள்ளதும், வினைத்திறனானதுமான முறையில் பயன்படுத்துவதற்கும், அலுவலர்களுக்கு அமைதியான மற்றும் சுதந்திரமான வேலைச் சூழலை உருவாக்குவதும் அவசியமாகும். அதற்கான ஒரு நடவடிக்கையாக ஒவ்வொரு அரசாங்க நிறுவனத்திலும் குவிந்துள்ள தேவையற்ற பொருட்களை அகற்றுவதற்காக "செயிரி வாரம்" என பிரகடனப்படுத்தி செயற்படுத்துவதற்கு அரசாங்கம் தீர்மானித்துள்ளது. அதற்கமைவாக இந்நிகழ்ச்சித்திட்டமானது 2025 ஆம் ஆண்டு செப்டம்பர் மாதம் 01 ஆம் தினத்திலிருந்து 04 ஆம் தினம் வரையில் அமுல்படுத்த தீர்மானிக்கப்பட்டுள்ளது.
அதனடிப்படையில் சம்மாந்துறை பிரதேச செயலகத்தில் இன்று(01)சம்மாந்துறை பிரதேச செயலாளர் எஸ்.எல் முஹம்மது ஹனீபா தலைமையில் செயிரி வாரம் ஆரம்பித்து வைக்கப்பட்டது.
பிரதேச செயலகத்தில் உள்ள ஒவ்வொரு கிளைகளிலும் தேவையற்ற கோவைகள் மற்றும் இலத்திரனியல் பொருட்கள் அகற்றப்பட்டு சுத்தப்படுத்தப்பட்டதோடு செயிரி வாரத்தை நடைமுறைப்படுத்தும் வகையில் ஒவ்வொரு கிளைகளிலும் பிரதேச செயலாளரினால் ஸ்டிகர்களும் ஒட்டப்பட்டது.
இந் நிகழ்வுகளில் உதவி பிரதேச செயலாளர் வீ.வாஸீத் அஹமட், பிரதித் திட்டமிடல் பணிப்பாளர்  கலாநிதி ஏ.எல் முஹம்மது அஸ்லம்,நிர்வாக உத்தியோகத்தர் ஜே.எம் ஜெமில், பிரதம் முகாமைத்துவ சேவை அதிகாரி எம்.ஏ.சீ.சீனத் உம்மா,உட்பட பிரதேச செயலக உத்தியோகத்தர்கள் பலரும் கலந்து கொண்டனர்.

அந்த வாரம் முழுவதும் ஒவ்வொரு நாளும் காலை வேளையில் சுமார் இரண்டு மணித்தியாலங்கள் நிறுவனத்தின் கட்டிடங்களுக்கு உள்ளேயும், வெளியேயும்,இவ் வேலைத்தை நடைமுறைப்படுத்தப்படவிருக்கின்றது என்பதும் குறிப்பிடத்தக்கது.